كواليس كرة القدم في تاجنانت

السلام عليكم ورحمة الله تعالى وبركاته



أما بعد قررت طرح هذا الموضوع للنقاش فيما يخص تقهقر فرق كرة القدم في تاج

وباسك تقدرو تقولو بلي راني نعرف بعض خبايا وكواليس هاته الفرق حبيت نشاركم بيها وكل واحد

فيكم عندو الحرية باعطاء رأيه في هاته الكواليس

المهم نبدا أنا نقصد هنا الدفاع الرياضي والجيل الصاعد احم أحم ومانقصدش الترجي باسك مهما يكون يبقى جديد وراهو يقدم لحد الان في نتائج مشرفة

أحيطكم علما ان الموسم الجديد افتتح الاسبوع الماضي يعني راهم بداو يونطرينيو المهم ربي يجيب الي فيه الخير
بصح قبل مايبداااو كون تسمعو واش صرات دراما وووووو
و
’

كل هذا بسبب تسديد المستحقات والديون وأكيد يمضيو كونطرمع اللاعبين والمدربين



وبعدها تبدا رحلة الدفاع عن عدم السقوط وهاته هي أهدافهم فقط و حتى كثرو ربي يجازيهم بالخير على كل حال


وكي تمر المرحلة هاذي بالخير نشكرو ربي


المرحلة الثانية تخص رئيس الفريق وهي مهمة صعبة بحيث يجب توفير أكبر مبلغ مالي بقالو من تسديد الحقوق باش على الاقل يشري طوموبيل جديدة ويخبي


دراهم باش يجوز العطلة في الصيف الجاي والطباخ ومولا اللبسة تاع اللاعيبين وبزاااف خدامين يستناوه حتى يدخلوه الدراهم الجدد

المرحلة الثالثة تتعلق بلاعبين البرانية


هاذو ياخاوتي مايلعبوش على وجه ربي باسك هو واش يهمو المهم يسلك وخلاص ولي يهمو الكونطرا هاذي يحلمو تاع تاج باش يشوفوها بصح تاع منا ولا منا


والله في دقيقة توجد ويهز دراهمو بعد انتهاء الموسم الاخر فيهم من 50 وطلع



اكيد 50 مليون ماش 50 خبزة

بصح وليد الفيلاج يجيبو يجوزو بيه الوقت ويعمرو بيه الثغرات وكي ينوب ربي راهم يسلكوه والله على ما أقول شهيد

المرحلة الثالثة تاع المدربين

المدرب وما ادراك مالمدرب الكل في الكل اكيد وماش لازم عليهم يجيبو براني بصح حنا نحبو البراني بزاااااااف ولازم نجيبوه قسنطيني ولا منا ولا منا باسك

ماعندناش مدربين فتاج ولا مايستعرفوش بيهم وكي يجي السي البراني يخلصولو عشاء و يمضيولو الكونطرا والا خاصاتو حاجة تكون عندو المهم ما تطيحش

ليكيب ماش تطلع هاذا حلم كبييير


والمساعد يكون من تاج اذا قالهم نخدم بكونطرا يقولو نتا ولد فيلاج ومعروف رايحين ناكلولك حقك ماعليش يصدقهم ويخدم على وجه ربي



بصح كي تخسر ليكيب ياويلو الي جامي سمعو يسمعو سراق الدراهم وووووووووو بصح ماعليش

المرحلة الرابعة



رانا في نهاية الموسم صحاب الجيل الصاعد يعسو فالدفاع والعكس تاني


يبداو كل واحد يشري فالماتش منا ولا منا هذا كامل باش ماتطلعش الاخرى وباي ثمن ويقدرو حتى يبيعو روحهم المهم ماتطلعش وحدة والاخرى تبقى ههه المهم


مساكن مايقدروش يلعبو وحدة الفوق والاخرى التحت

ولا الموسم الي فات سمعو تاع الدفاع بلي تاع الجيل طلعو ماتو و بصح جاهم خبر بلي تاع تيارت الي تلعب فوووور عليهم وماطلعتش فرحو باسك الجيل تبقى طايحة


المهم
هاذو شوية تاع التفاهات الي راهي تواكب تطور كرة القدم في تاج



ونوعدكم بكل جديد في كل من الفرق

شكرا جزيلا ليليا مقال نقدي مثالي
برافو عليك
بالتأكيد نتمنى أن نقرأ جديدك

عندك الحق يا ليليا البالون في تاجنانت راه عاد مصالح و دراهم كثر منو رياضة تنافسية شريفة ..
و أحيانا يغيضوني الشبان اللي معلقين أمال على الفرق تاعهم و في الأخير يلقاو باللي راهم آخر حاجة يفكر فيها المسيرين
دراهم كبار يروحو في البالون على جال هاذ النتائج و التلاعبات اللي راهي تصرا يعلم بيها ربي .. و حتى العبد بصح واش راح تقول شكون يسمعك ..
و الله بزاف رانا روطار بزاف بالنسبة للإمكانيات لي عندنا
و هاذ الأمر يستدعي تدخل عاجل و فعال خاطر راهي الفرصة المناسبة
في وقت النهضة الكروية الي عرفتها الجزائر في الفترة الأخيرة
و إلا فلن ترى الفرق التاجنانتية النور على الإطلاق


شكرا علىالموضوع ليليا تاج
بارك الله فيك

مشكورين على المرور والردود


ويا أخ زكي أنا ماش قصدي نفضح ولا شي من هذا باسك الدنيا كامل علابالها واش راه صاري


و


موضوعي لن يزيد ولن ينقص في شيء يعني ماراح يطيحهم ولا يطلعهم رايحييين يبقاو هوما هوما مادامهم مازالو يقيمو


فالبراني على حساب ولاد الفيلاج